Një helikopter me shtatë persona në bord, përfshirë katër shtetas turq dhe dy libanezë, është zhdukur në Italinë qendrore, raporton Anadolu Agency (AA).

Sipas të përditshmes italiane ‘II Gazzettino’, një helikopter ‘Agusta Koala’ që mbante katër turq, dy libanezë dhe një pilot Italian dje u ngrit nga aeroporti ‘Capannori Lucca Tassignano’ në qytetin Lucca për në qytetin Treviso, por shpejt u zhduk nga radari.

Burime diplomatike në Itali për AA thanë se katër shtetas turq që punonin për një kompani private turke ishin në helikopter.

Sipas informacioneve të para, helikopteri është zhdukur në kufirin midis rajoneve italiane Tuscany dhe Emilia-Romagna. Megjithatë, deri më tani nuk ka asnjë informacion të saktë në lidhje me vendndodhjen e helikopterit të zhdukur.

Ministria e Punëve të Jashtme e Türkiye-s tha se ambasada turke në Romë mban komunikim të rregullt si me autoritetet italiane ashtu edhe me zyrtarët e kompanisë turke.

‘II Gazzettino’ raportoi se autoritetet italiane nisën një operacion kërkimi dhe patrulluan rajonin Apennine në kufirin midis provincave Lucca dhe Modena, veçanërisht zonën midis Pievepelago dhe San Pellegrino në Alpe.

Burime për AA thanë se operacioni u pezullua mbrëmë për shkak të errësirës dhe rifilloi mëngjesin e sotëm.